د ګوندي توطه ګرانو سره وحدت خيانت دئ

ګوندي کودتاچيانو منصوبه يې رسوا کړه، اوس دغه ښاغلی  وايي چي دغه کليپونه د حزب پر غړو کوم بد تأثير ندی کړی  .  زما سره د پروني ګوندي شخص په حیث دا سوال پيداشو چي دغه روان ځانته څرنګه اجازه ورکوي چي دغه شاني غوښتنه د ټولو ګونديانو  په نمايندګي  وکړي  ؟  او بل دا چي کوم ويډيو کليپونه چي تازه  خپاره شوي دي  نوموړي د کوم منطق پر اساس دا جرأت ځانته ورکوي  چي د ټولو ګونديانو  نظر دي څرګند کړي او د هغوی په استازیتوب وواي چي بد تاثیر يې ندی کړی  ؟

زما او دهر ليدونکي  د پاره خو دغه کليپونه  د لوی خيانت ژوندی سند دی .  په دې ژوندي  سند کي د ډاکټر نجيب الله پر ضد چي د روسانو په  ډيکټه  د همدې ګوندي اماتورانو لخوا چي ځانونه يې د ګوند و لوړو کړيو ته رسولي وه، کودتا وشوه، دغه کليپونه خو ددغه داستان  يو ګويا تاريخ هم دئ .  دا خو د همدې خائينو لخوا وو چي د ملګرو ملتو د سولي پروسه  يې  شنډه کړه ، همدغه مفسدین وه چي ډاکټرنجيب الله يې خلع او قدرت يې دودسته  د شمال و ګلم جمانو او نظاريانو ته تسليم  کړ. همدغه جنايت کاران وه چي کورنۍ جګړو ته يې  اور  بل او کابل يې وران کړ .

روان اوس ځان د دې خاینانو او جنایت کارانو مدافع و کيل ګڼي  او په ډيره ناځوانۍ  سره ځان د ټولو ګونديانو  کلانتر ګڼي  دا ږغ را پورته کوي چي دغه کلیپونه پر ګونديانو بد تاثیر ندئ کړی او دا د افغانستان د تاريخي دښمنانو کار دئ چي نه غواړي د علومي او فراګيرو تر مینځ وحدت ټينګ شي ! رشتيا دغه کليپونه به  روان غوندي اماتور ګوندیانو باندي بد  نه وي لګېدلي    خو که روان د ګوند دټولو غړو او د افغانستان  دمظلوم ولس په استازیتوب خبري کوي نو پوه شه چې هغوی اوس په هر څه پوهيږي او هيڅکله به هم و ملي خائينو ته سلامي نه شي او  د هغوی تر رهبري لاندي دي به وحدت ونه کړي .

روان بايد لومړی خپل حد وپېژني د هر چا ډيکټې په خپل نامه خپرې نکړي او د خپل صلاحيت نه اوچت  خېزه کي و نه هي .  د ټولو ګونديانو  نمايندګي   و نوموړي ته هيچا نده ورکړې ، او که بيا نوموړی د هغوخائينيو په استازيتوب کوي نو دا خبره دي ښه غوږ شي چي د افغانستان خلک ،پروني ګونديان   نني ځوانان   د وطن  د خائينيو سره اصلاً وحدت  نه  غواړي او نه يې غوشتی دئ، دغه وطنپلوره اشخاص ملي خائینین او د ګوند د بربادۍ ،  د کابل د ورانۍ او د اویاوو زرو کابلیانو قاتلین دي، او د نن ورځي د مصيبتو عاملين ،لوی جنايت کاران او ګوندي مفسدين هم  دي . د هغوی سره  وحدت  ملي خیانت دی     .

پاچاګل