د حماس یو پلاوی په غزه کې د جګړې د پای ته رسولو لپاره د ډیپلوماتیکو هڅو په ترڅ کې د اور بند په تړاو خبرو اترو لپاره قاهرې ته ځي.

د حماس یوه جګپوړي چارواکي ویلي دي چې دغه ډله د اوربند او د یرغمل شویو د خلاصون په اړه د اسرائیلو له وروستي وړاندیز سره کومه "بنسټیزه ستونزه" نه لري، خو لا تر اوسه د پرمختګ څرګندې نښې نه شته.

حماس تایید کړې چې ۳۳ ژوندي یرغملان د دوی په لاس کې دي. پاتې یرغمل شوي کسان د نورو ډلو لکه اسلامي جهاد په لاس کې دي. د اسرائیلو د اټکل له مخې اوس هم په غزه کې ۱۲۹ تنه یرغمل شوي ساتل کېږي.

د اسرائیلو حکومت د خپلو متحدینو او د یرغمل شویو کورنیو له خوا تر فشار لاندې دی چې یوې موافقې ته ورسېږي.

د امریکا د بهرنیو چارو وزیر انتوني بلېنکن په سعودي عربستان کې دی او هلته به د یوې موافقې د ترلاسه کولو پر هڅو هم خبرې وکړي.

په ورته وخت کې، د اوربند او د یرغمل شویو خوشي کولو هڅو په ترڅ کې، د اسرائیلو په حکومت کې اختلافات لا پسې ژور شوي..

د ملي یووالي ګوند مشر او د اسرائیلو د جګړې د کابینې غړی، بیني ګانټز وویل، که حکومت د یرغمل شویو بندیانو له خوشي کولو سره موافقه ونه کړي، د خپل موجودیت حق به له لاسه ورکړي.

خو د اسرائیلو د مالیې سخت دریځي وزیر بیتسالیل سموتریچ دا ډول تړون "یوه سپکوونکې تسلیمي" بللې او ویلي یې دي چې که پر رفح ځمکني برید ودرول شي، د اوسني حکومت کار باید دوام ونه کړي.

له بلې خوا د فلسطین روغتیايي چارواکي وايي، د غزې په جنوبي ښار رفح کې د اسرائیلو په هوايي بریدونو کې لږ تر لږه دیارلس تنه وژل شوي دي.

ډاکټرانو ویلي دي چې یو زیات شمېر کسان ټپیان شوي دي. د غزې د ښار په شمال کې هم د یو شمېر کسانو د ټپيانېدو رپوټونه ورکړل شوي دي.

د امريکا او لوېديځو هېوادونو له غوښتنې سره سره اسرائيل وايي هوډ لري چې پر رفح بريد وکړي. رفح کې د غزې تر یو میلیون ډېرو اوسېدونکو پنا اخیستې ده.

څو میاشتې کېږي چې د اسرائيلو بمباريو او ځمکنيو بريدونو تر ۳۴۰۰۰ زيات کسان وژلي او د غزې يوه لويه برخه يې ويجاړه کړې ده.

تر دې مخکې د فلسطیني ادارې مشر محمود عباس ویلي وو چې امریکا یوازېنی هېواد دی چې کولای شي پر رفح د اسرائیلو د برید مخه ونیسي. د ده په وینا، داسې برید چې ډېری فلسطینیان له غزې تېښتې ته اړایستلي دي.

مصر او نورو عرب حکومتونو مخکې ویلي وو چې له جګړې تښتېدونکي فلسطینیان به د منلو وړ نه وي ځکه چې دا به د فلسطینیانو د شړلو په معنا وي.

د سپوږمکۍ په مټ اخیستل شویو عکسونو ښودلې چې د غزې ساحل ته څېرمه د رفح لوېدیځ ته او د خان یونس ښار لږ څه نور شمال ته نوې خیمې درول شوې چې په لویه کچه ویجاړې پاتې دي. د رسنیو راپورونه وايي چې خیمې له رفح د بې‌ځایه شویو خلکو د ځای پرځای کولو لپاره دي.

د افغانستان د فوټسال ملي ټیم د ۲۰۲۴ کال د نړیوال جام سیالیو ته د رسیدلو په وروستۍ لوبه کې د قرغیزستان ټیم ته د پنځه په دریو ګولونو په توپیر ماتې ورکړه او ددغو لوبو وروستیو سیالیو ته یې لاره وموندله.

د افغانستان د فوټسال کمیټې په یوه اعلامیه کې د افغانستان خلکو او د فوټسال لوبغاړو ته ددې بري مبارکي ورکړې او ویلي دي چې دا لومړی ځل دی چې د افغانستان د فوټسال ملي ټیم نړیوال جام ته لاره مومي.

د افغانستان د فوټسال ملي ټیم د یکشنبې د ورځې د غرمې دمخه اپریل ۲۸ (ثورنهم) په تایلنډ کې د قرغیزستان ملي ټیم سره مخامخ شو، چې په پایله کې د دریو په مقابل کې په ۵ ګولونو دا لوبه وګټله.

ددې لوبې درې ګولونه د امید فقیري، امید کاظمي او مهدي نوروزي له خوا ووهل شو او مهران غلامي هم د افغانستان لپاره د قرغیزستان د ملي ټیم پر وړاندې دوه ګلونه ووهل.

د افغانستان د فوټسال ملي ټیم د ۲۰۲۴ کال د نړیوال جام په نیمه وروستۍ سیالۍ کې په خپله لومړۍ لوبه کې عراق ته د ۳ ګلونو په مقابل کې په ۵ ګولونو ماتې ورکړې وه.

د عراق سره په سیالۍ کې اکبر کاظمي، فرزاد محمودي، جواد صفري هر یو، د افغانستان لپاره یو، یو ګول وهلی و، خو مهران غلامي په دغه سیالۍ کې هم د خپل هیواد لپاره دوه ګولونه وهلي وو.

د فوټسال نړیوال جام لسم پړاو سیالۍ د روان ۲۰۲۴ کال د سپټمبر د میاشتې له ۱۴ څخه د اکتوبر تر ۶ پورې په اوزبیکستان کې ترسره کیږي.

ټاکل شوې په دې سیالیو کې به ۲۴ ټیمونه برخه واخلي. افغانستان، فرانسه، نیوزیلنډ او تاجیکستان د هغو ټیمونو په ډله کې دي چې په لومړي ځل یې دغه جام ته لاره موندلې ده.

د بلوچستان مرکز کوټې کې یو قاضي پولیسو ته امر کړی چې د پښتونخوا ملي عوامي ګوند مشر، محمود خان اڅکزی ونیسي او د شنبې په ورځ اپریل ۲۷ دې محکمې ته وړاندې کړي.

په پاکستاني مطبوعاتو کې ویل شوي چې په همدې روان میلادي کال کې د ښاغلي اڅکزي په خلاف د پولیسو سره یو شکایت ثبت شوی و چې پکې د پښتونخوا ملي عوامي ګوند په مشر تور لګول شوی و چې په غیر قانوني توګه یې د حکومت ځمکه نیولې ده.

پولیسو همدرانګه ویلي دا چې ښاغلی اڅکزی د همدې قضیې په تړاو محکمې او د پولیسو مرکز ته ندی حاضر شوی، په کوټې کې یو قاضي یې جمعه اپریل ۲۶ (غوایي اوومه) د نیولو حکم صادر کړی.

خو بل پلو بیا د بلوچستان ولایت لپاره د محمود خان اڅکزي د ګوند ولایتي مشر، عبدالقهار خان ودان دا مقدمه " بې بنسټه او دروغجنه" بللې او ویلي یې دي چې د خپل ګوند د مشر د ضمانت لپاره به محکمې ته ولاړ شي.

ښاغلي ودان د امریکا غږ ډیوه څانګې ته ویلي چې دا مقدمه د محمود خان او د دې ګوند پر ضد د پاکستان د استخباراتي ادارو لخوا "سياسي انتقامي کړنه" ده.

ښاغلي ودان زیاته کړ، "موږ به بيا هم په يوه قيمت له خپل سياسي مرام څخه پر شا نه شو، موږ په پاکستان کې د ټولو ادارو قانوني ازادي او په سياست کې د ملکي ادارو مداخلت بندېدل غواړو چې په همدې خبره موږ ته سزا راکول کېږي".

پولیسو د همدې کور په تړاو چې تور دی محمود خان اڅکزي په غیر قانوني توګه نیولی، د روان میلادي کال د مارچ میاشتې په دریمې نیټې چاپه واچوله او یو تن یې ونیوه.

خو پښتونخوا ملي عوامي ګوند بیا ویلي و چې د دوی مشر یې ځکه په نښه کړی چې د قامي اسمبلۍ غونډې ته په خپله وینا کې، په پاکستان کې د فبرورۍ اتمې په ټولټاکنو کې د پراخې درغلۍ او په هغه کې د ښکېلو کسانو په باب رښتیا څرګندونې کړې وې.

د ګوند ولایتي مشر ښاغلی قهار خان ودان هم وایي چې د پولیسو څخه یې دا تن په ضمانت راخوشې کړی او له دې مقدمې سره کوم تړاو نه لري.

ښاغلي ودان وړانې وویل، "کومه مځکه چې پوليس او سرکار یې يادوي له دې سره د محمود خان او کورنۍ يو ډول تعلق هم نه شته".

د ښاغلي اڅکزي د نیولو حکم داسې مهال ورکول کیږي چې هغه تیره ورځ په اسلام آباد کې د واکمن حکومت پر ضد د نوي جوړ شوي ائتلاف د مشرانو سره وکتل. اڅکزي ددې ملاقات څخه وروسته خبریالانو ته وویل چې دا ائتلاف د پوځ او استخباراتي ادارو په ګډون د دولتي ادارو په خلاف د ناوړه تبلغیاتو لپاره نه بلکې د پاکستان د ژغورلو لپاره جوړ شوی.

د پښتونخوا ملي عوامي ګوند هم په یوې اعلامیې کې د ښاغلي اڅکزي د نیولو لپاهر د محکمې حکم غندلی او ادعا یې کړې چې پولیس او حکومت دا کړنې د اڅکزي د غلي کولو لپاره کوي.

په اعلامیې کې ویل شوي چې دا ګوند به د ټولو ستونزو سربیره "خپلې هلې ځلې" جاري ساتي.

د پخواني صدراعظم عمران خان د پاکستان تحریک انصاف ګوند (پي ټي ای) د پلوي ډلې سني اتحاد شورا د ملاتړ د ترلاسه کولو وروسته د پښتونخوا ملي عوامي ګوند مشر محمود خان اڅکزي د پاکستان ولسمشرۍ ته کاندید کړی و خو د شهباز شریف په مشرۍ د اوسني ائتلافي حکومت کاندید، آصف علي زرداري په مقابل کې یې ماتې وخوړله.