د افغانستان د فوټسال ملي ټیم د ۲۰۲۴ کال د نړیوال جام سیالیو ته د رسیدلو په وروستۍ لوبه کې د قرغیزستان ټیم ته د پنځه په دریو ګولونو په توپیر ماتې ورکړه او ددغو لوبو وروستیو سیالیو ته یې لاره وموندله.

د افغانستان د فوټسال کمیټې په یوه اعلامیه کې د افغانستان خلکو او د فوټسال لوبغاړو ته ددې بري مبارکي ورکړې او ویلي دي چې دا لومړی ځل دی چې د افغانستان د فوټسال ملي ټیم نړیوال جام ته لاره مومي.

د افغانستان د فوټسال ملي ټیم د یکشنبې د ورځې د غرمې دمخه اپریل ۲۸ (ثورنهم) په تایلنډ کې د قرغیزستان ملي ټیم سره مخامخ شو، چې په پایله کې د دریو په مقابل کې په ۵ ګولونو دا لوبه وګټله.

ددې لوبې درې ګولونه د امید فقیري، امید کاظمي او مهدي نوروزي له خوا ووهل شو او مهران غلامي هم د افغانستان لپاره د قرغیزستان د ملي ټیم پر وړاندې دوه ګلونه ووهل.

د افغانستان د فوټسال ملي ټیم د ۲۰۲۴ کال د نړیوال جام په نیمه وروستۍ سیالۍ کې په خپله لومړۍ لوبه کې عراق ته د ۳ ګلونو په مقابل کې په ۵ ګولونو ماتې ورکړې وه.

د عراق سره په سیالۍ کې اکبر کاظمي، فرزاد محمودي، جواد صفري هر یو، د افغانستان لپاره یو، یو ګول وهلی و، خو مهران غلامي په دغه سیالۍ کې هم د خپل هیواد لپاره دوه ګولونه وهلي وو.

د فوټسال نړیوال جام لسم پړاو سیالۍ د روان ۲۰۲۴ کال د سپټمبر د میاشتې له ۱۴ څخه د اکتوبر تر ۶ پورې په اوزبیکستان کې ترسره کیږي.

ټاکل شوې په دې سیالیو کې به ۲۴ ټیمونه برخه واخلي. افغانستان، فرانسه، نیوزیلنډ او تاجیکستان د هغو ټیمونو په ډله کې دي چې په لومړي ځل یې دغه جام ته لاره موندلې ده.

د بلوچستان مرکز کوټې کې یو قاضي پولیسو ته امر کړی چې د پښتونخوا ملي عوامي ګوند مشر، محمود خان اڅکزی ونیسي او د شنبې په ورځ اپریل ۲۷ دې محکمې ته وړاندې کړي.

په پاکستاني مطبوعاتو کې ویل شوي چې په همدې روان میلادي کال کې د ښاغلي اڅکزي په خلاف د پولیسو سره یو شکایت ثبت شوی و چې پکې د پښتونخوا ملي عوامي ګوند په مشر تور لګول شوی و چې په غیر قانوني توګه یې د حکومت ځمکه نیولې ده.

پولیسو همدرانګه ویلي دا چې ښاغلی اڅکزی د همدې قضیې په تړاو محکمې او د پولیسو مرکز ته ندی حاضر شوی، په کوټې کې یو قاضي یې جمعه اپریل ۲۶ (غوایي اوومه) د نیولو حکم صادر کړی.

خو بل پلو بیا د بلوچستان ولایت لپاره د محمود خان اڅکزي د ګوند ولایتي مشر، عبدالقهار خان ودان دا مقدمه " بې بنسټه او دروغجنه" بللې او ویلي یې دي چې د خپل ګوند د مشر د ضمانت لپاره به محکمې ته ولاړ شي.

ښاغلي ودان د امریکا غږ ډیوه څانګې ته ویلي چې دا مقدمه د محمود خان او د دې ګوند پر ضد د پاکستان د استخباراتي ادارو لخوا "سياسي انتقامي کړنه" ده.

ښاغلي ودان زیاته کړ، "موږ به بيا هم په يوه قيمت له خپل سياسي مرام څخه پر شا نه شو، موږ په پاکستان کې د ټولو ادارو قانوني ازادي او په سياست کې د ملکي ادارو مداخلت بندېدل غواړو چې په همدې خبره موږ ته سزا راکول کېږي".

پولیسو د همدې کور په تړاو چې تور دی محمود خان اڅکزي په غیر قانوني توګه نیولی، د روان میلادي کال د مارچ میاشتې په دریمې نیټې چاپه واچوله او یو تن یې ونیوه.

خو پښتونخوا ملي عوامي ګوند بیا ویلي و چې د دوی مشر یې ځکه په نښه کړی چې د قامي اسمبلۍ غونډې ته په خپله وینا کې، په پاکستان کې د فبرورۍ اتمې په ټولټاکنو کې د پراخې درغلۍ او په هغه کې د ښکېلو کسانو په باب رښتیا څرګندونې کړې وې.

د ګوند ولایتي مشر ښاغلی قهار خان ودان هم وایي چې د پولیسو څخه یې دا تن په ضمانت راخوشې کړی او له دې مقدمې سره کوم تړاو نه لري.

ښاغلي ودان وړانې وویل، "کومه مځکه چې پوليس او سرکار یې يادوي له دې سره د محمود خان او کورنۍ يو ډول تعلق هم نه شته".

د ښاغلي اڅکزي د نیولو حکم داسې مهال ورکول کیږي چې هغه تیره ورځ په اسلام آباد کې د واکمن حکومت پر ضد د نوي جوړ شوي ائتلاف د مشرانو سره وکتل. اڅکزي ددې ملاقات څخه وروسته خبریالانو ته وویل چې دا ائتلاف د پوځ او استخباراتي ادارو په ګډون د دولتي ادارو په خلاف د ناوړه تبلغیاتو لپاره نه بلکې د پاکستان د ژغورلو لپاره جوړ شوی.

د پښتونخوا ملي عوامي ګوند هم په یوې اعلامیې کې د ښاغلي اڅکزي د نیولو لپاهر د محکمې حکم غندلی او ادعا یې کړې چې پولیس او حکومت دا کړنې د اڅکزي د غلي کولو لپاره کوي.

په اعلامیې کې ویل شوي چې دا ګوند به د ټولو ستونزو سربیره "خپلې هلې ځلې" جاري ساتي.

د پخواني صدراعظم عمران خان د پاکستان تحریک انصاف ګوند (پي ټي ای) د پلوي ډلې سني اتحاد شورا د ملاتړ د ترلاسه کولو وروسته د پښتونخوا ملي عوامي ګوند مشر محمود خان اڅکزي د پاکستان ولسمشرۍ ته کاندید کړی و خو د شهباز شریف په مشرۍ د اوسني ائتلافي حکومت کاندید، آصف علي زرداري په مقابل کې یې ماتې وخوړله.

د امریکا د متحده ایالاتو د بهرنیو چارو وزارت ویلي چې ددغه وزارت سیاسي معینیت سرپرست جان باس به سیمې ته د خپل سفر په ترڅ کې قطر او پاکستان کې ددغو هیوادونو د چارواکو سره د دواړخیزو اړیکو اړوند مسلو په سر د خبرو ترڅنګ د افغانستان او سیمې د امنیت په اړه هم خبرې وکړي.

دغه وزارت د جمعې په ورځ اپریل ۲۶ (ثور اووم) په یوه خبرپاڼه کې ویلي چې، جان بس به د اپریل له ۲۶ تر ۳۰ پورې قطر او پاکستان ته سفر وکړي.

پخپله جان باس د جمعې په ورځ اپریل ۲۶ (ثور اووم) د ایکس په پاڼه سیمې ته د خپل سفر خبر ور کړی :" زه د قطري او پاکستاني چارواکو سره د دواخیزو اړیکو او زمونږ د ګډو سیمه ییزوامنیتي ګټو په سر د خبرو لپاره دوحې او اسلام اباد ته روان یم".

د امریکا د متحده ایالاتو د بهرنیو چارو وزارت د خبر پاڼې له مخې جان باس به د قطر په پایتخت دوحه کې د دغه هېواد له لوړپوړو چارواکو سره د لیدو کاتو سربیره د یو شمیر نورو هیوادونو د دپلوماتیکي ماموریتونود استازو سره د افغانستان د ملاتړ او په سیمه کې د ګډو امنیتي ګټو په اړه خبرې وکړي.

په دغه خبر پاڼه کې ویل شوي چې جان بس به اسلام‌اباد ته په سفر کې د پاکستان له لوړو پوړو چارواکو سره د امریکا د متحده‌ایالاتو او پاکستان او هم په یو لړ سیمه ییزواو دوه اړخیزو مسایلو په تړاو خبري وکړي.

جان باس د ۲۰۲۱ کال د اګست د میاشتې دمخه په افغانستان کې هم د امریکا د متحده ایالاتو د سفیر په توګه کار کړی دی.

اسلام اباد ته د جان باس ددغه سفر دمخه د امریکا د متحده ایالاتو د بهرنیو چارو وزارت کې د مدیریت او سرچینو د چارو مرستیال ریچارډ ورما هم د روان ۲۰۲۴ کال د جنورۍ په دوییمه اونۍ کې پاکستان ته په سفر تللی وو..

ریچارډ ورما د پاکستاني چارواکو سره د کتنې سربیره د نړیوالو سازمانونو او له هم نظرو شریکانو سره هم کتلي وو او د هغو افغانانو څخه د ملاتړ په اړه یې چې د امریکا متحده ایالاتو او یا د امریکا د متحده ایالاتو د حکومت په استازیتوب یې په افغانستان کې کار کړی د امریکا په ژمنو ټینګار کړی وو.

د ریچارډ ورما د سفر په اړه د امریکا د متحده ایالاتو د بهرنیو چارو وزارت په خبر پاڼه کې ویل شوي وو: "د بهرنیو چارو وزارت مرستیال ورما د زیانمنوونکو وګړو او په شرایطو برابرو افغانانو د بیا میشتیدو په اړه زمونږ د ګډې علاقې په اړه خبرې کړي دي".

د افغان کډوالو د بیا مشتیدو د اړوند مسلو په سر د خبرو لپاره اسلام اباد ته ددغه لوړپوړي امریکايي چارواکي د سفر دمخه د ۲۰۲۳ کال د ډسمبر څلورم (لیندۍ ۱۳) هم یو امریکايي پلاوي د پاکستاني چارواکو سره د زیانمنوونکو افغان کډوالو او په امریکا کې د افغان کډوالو د بیا میشتیدو د بهیر په اړه خبرې کړې وې.

د وګړو او کډوالوپه چارو کې د امریکا د بهرنیو چارو د وزارت د مرستیالې جولیټا والزنویس په مشرۍ یو پلاوي اسلام اباد ته د خپل سفر په ترڅ کې د غیر دولتي ادارو او نړیوالو سازمانونو د استازو سره هم د افغان کډوالو د وضعیت په اړه خبرې کړې وې.